Calendario Celta: mes da Vide

Calendario celta: comeza o mes da vide (Vitis vinifera).

Nome celta: Muin.

Durará dende o 2 de setembro até o 29 de setembro.

A vide, árbore da vida para os antigos sumerios, foi unha das primeiras plantas que a humanidade domesticou e tan importante chegou a ser que o cultivo das viñas considerouse símbolo de civilización, por iso non é estraño que a vide acabara adquirindo carácter divino e o viño sacralizado en moitas culturas relixiosas, xa que dende antigo se relacionou o viño co sangue e o sangue coa vida.

As civilizacións mediterráneas, grega e romana, potenciaron o cultivo da vide nas rexións occidentais, entre elas a península Ibérica, na que xa os primeiros poboadores cultivaron a vide ventureira ou labrusca (Vitis sylvestris), especie da que por selección derivou a actual Vitis vinifera coas súas numerosas variedades.

Pousos de viño atopados en fragmentos de ánforas sumerias garanten ao viño unha antigüidade de seis mil anos na zona oriental de orixe, mentres que a primeira viticultura estruturada no occidente mediterráneo dátase en Marsella seis centos anos antes de Cristo, sendo aí onde se substituíron as ánforas romanas por toneis de madeira, o que facilitou considerablemente o almacenamento e conservación do viño.

Ridimoas úbicase no mesmo corazón do Ribeiro de Avia. Algunhas viñas lindantes co bosque son propiedade da asociación e nelas cultívanse de forma ecolóxica as principais variedades de uvas do Ribeiro.