Observación de Pomba Brava

Na primavera, en Ridimoas, o corpulento pombo (Columba palumbus) sempre alternou coa delicada presenza da rula (Streptopelia turtur); pero este ano, estamos vendo que, mesturadas coas rulas, apareceu unha parella de pombas bravas (Columba livia). Non temos claro de onde veñen, pois o seu hábitat natural é tipicamente rupestre, polo que posiblemente so estean de paso.

Da Columba livia proceden tódalas razas e variedades das pombas domésticas. O propio Darwin puido comprobar que despois de poucas xeneracións cruzando pombas domésticas de aspecto moi distinto, os seus descendetes volvían parecerse á especie antecesora: a pomba brava.

Algunhas características da pomba brava:

• Entre 30 e 35 cm de longo.

• Banda negra no extremo do rabo.

• Dúas franxas escuras que cruzan totalmente as rémixes secundarias.

• Plumas supracobertoiras caudais brancas.

• Irisacións verdes e violetas no pescozo.

• Peteiro curto de cor gris con abultamentos brancos sobre as narinas.

• Ollos de cor laranxa.

• Patas vermellas.