Morte por electrocución

Hai dous días avisamos ao 062 da presenza de dous buxatos (Buteo buteo) atopados mortos na base dun poste eléctrico situado á beira dun camiño na localidade ribeirán da Groba (Ribadavia); presentáronse no lugar axentes do SEPRONA e de Medio Ambiente para recoller as aves, presumiblemente mortas por descarga eléctrica.

É evidente que este apoio é frecuentado por rapinas (especies protexidas) xa que no chan había plumas vellas doutro éspecime morto con anterioridade, polo que urxe arranxar esta situación, eliminando as causas de electrocución, modificando o deseño do poste e instalando sobre o cableado un pousadoiro debidamente illado e máis atractivo para as aves.

En Galicia, a magnitude da morte de aves por electrocución ou por impacto contra cables, non está avaliada, pero a nivel estatal hai estudos que estiman a siniestralidade nun millón de individuos mortos ao ano.