Florean as centauras

Dende hai uns días, nuns poucos hábitats do bosque florean as centauras (Centaurea nigra subsp. rivularis). Vexetan de forma individual ou en pequenos grupos, en terra seca e compacta, aproveitándose dos claros ocasionados, na carballeira, pola roza manual do sotobosque.

Esta planta, de máis de medio metro de altura, é un endemismo ibérico basicamente do cuadrante NO asociada á orla da carballeira e a pasteiros seminaturais. Segundo a lenda mitolóxica, recibe tal nome por curar dunha ferida ao centauro Quirón.

Por ser máis ben atlántica, en Ridimoas o seu status é de non frecuente e considérase relicta de climas máis húmidos.

Ilustración de Pablo Oitabén.

Foto (arriba) de Xusto Veloso.