Día Mundial do Medioambiente

Este ano en Ridimoas conmemoramos esta data tan destacada cunha boa nova: a doazón de parcelas á nosa asociación por parte do socio J.F.R. En total suman 5.296 metros cadrados de bosque autóctono en sete paraxes colindantes co bosque Ridimoas, na localidade ourensá de Bieite (Leiro).

Aínda non tivemos tempo de inventariar o patrimonio natural existente, pero na primeira parcela que visitamos puidemos observar unha avelaiona (Strix aluco), así como un nutrido grupo de gaios (Garrulus glandarius). Na parte alta abundan os carballos (Quercus robur) e na parte baixa os amieiros (Alnus glutinosa) en primeira liña de auga do regato de Caldelas, con sobosque de fento real (Osmunda regalis) e rascacú (Ruscus aculeatus). Nun pé de aveleira (Corylus avellana) apreciamos rascaduras de corzo (Capreolus capreolus).

Moitísimas grazas polo donativo e graciñas a todas as persoas que coas vosas aportacións facedes posible que o labor de conservación continúe!