A auga e a vida

As abundantes chuvias destes días están a propiciar un ambiente favorable aos anfibios. Na parte alta do bosque, a auga de filtración empezou a encher pozos e mananciais, activando a reprodución das píntegas en sintonía co ciclo natural da auga; mentres que na parte baixa aumentou o caudal do regato da Barbaña, dando nova vitalidade a especies vexetais e animais asociados ao medio acuático.

Reflexionando sobre a auga e a vida, non podemos abstraernos dos acontecementos presentes e ver como se lle priva á poboación palestina do subministro da auga potable. Tal deshumanización reforza as palabras que hai tempo alguén pronunciou: "O paraíso está na vida silvestre, o inferno levámolo nós dentro".