Calendario Celta: Mes do Acevo

Calendario celta: comeza o mes do acevo (Ilex aquifolium). Nome celta: Tinne. Durará dende o 8 de xullo até o 4 de agosto.

Os antigos druídas celtas marcaban os meses arredor do ciclo luar e cun período aproximado de 28 días cada un desde a primeira lúa chea do ano, que comezaba en decembro. A duración dos meses adaptárona á observación directa da paisaxe e foron axustando o número de días para que sempre tivesen unha duración semellante. Así, pouco a pouco, foron fixando un calendario anual. O ano celta comezou o 24 de decembro co mes do bidueiro e oito lúas despois comeza o mes do acevo, que nestes días mostra os seus froitos, aínda verdes, no seu tamaño máximo; faltan catro días para a lúa chea e pasaron vinte oito do mes do carballo, que neste tempo foi acadando a cor verde esmeralda definitiva das follas e amosando pequenas landras. Foto: Pablo Rodríguez.