Unha antiga adiviñanza describe a esta abundantísima rosácea no enigma da súa pregunta: "Longa como unha soga, con dentes como unha loba". A silva, en Ridimoas pode verse tanto no interior do bosque como á beira de camiños. O maior silveiral do noso bosque atópase nun monte na paraxe da Anduriñeira, asentado nunha ladeira de exposición leste con solo fresco de antiga viña e boa insolación, onde compite cos piñeiros que con dificultade tratan de recuperar o espazo perdido nun incendio de finais dos anos setenta.