Coñecido tamén por "alarvio das cebolas", é un ortóptero gordo, de cor abrancazada tirando a ocre. Por agora é localmente abundante na paraxe do Pombal, de exposición leste, onde as viñas chegan a entrar no mesmo casco urbano de Beade. O matabois canta dentro do seu burato co cu para afora, aproveitando a cavidade como caixa de resonancia; e resulta tan intenso o seu grilar que as fortes vibracións emitidas son percibidas polo camiñante a un metro de distancia.