top of page

Cobra de escada (Elaphe scalaris) 

Ofidio diurno e musculoso que pode superar o metro e medio de longo, aínda que en Ridimoas o exemplar máis grande foi observado na paraxe do Poenxo, o día 3 de xullo de 2004 e semellaba non superar o metro. Ten carácter valente e deféndese lanzando a boca cando alguén trata de capturala. As femias son máis grandes e robustas cós machos, con cola proporcionalmente máis curta.

Aliméntase de réptiles menores ca ela, micromamíferos e paxaros. Normalmente é de cor castaña ou ocre coa parte ventral amarela esbrancuxada. Unha das fotos (na que aparece en primer plano) corresponde a un xuvenil, pois aínda presenta un debuxo dorsal semellante a unha escada; pero a partir dos catro anos de idade, xa adulta, non se lle aprezan os chanzos transversais, mantendo só as lonxitudinais; de aí o sinónimo: serpe riscada.

 

A cobra de escada non é venenosa e está protexida pola lei ó ser catalogada de interese especial.

 

 

 

Fotos: Oitabén e Xusto Veloso.

 

 

bottom of page